बेथानचोक। स्थानीय तह निर्वाचन नजिकिएसँगै उम्मेदवारहरु मत माग्दै घरदैलोमा व्यस्त छन् । बेथानचोक गाउँपालिका वडा नम्बर २ का एमाले उम्मेदवार चेतनाथ तिमिल्सना भने मत माग्दै किसानको बारीमा पुगेर काम सघाइरहेका भेटिन्छन् ।
अहिले बेथानचोकका बारीमा गहुँ पाकेको छ । यहाँका किसान गहुँ थन्क्याउने चटारोमा छन् । यही बेला उम्मेदवारहरु मत माग्दै घरघर पुगिरहेका छन् । यही क्रममा बेथानचोक–२ पाटनेखोलाका किसान विष्णु तिमिल्सिनाको घरमा मत माग्न पुगेका एमाले उम्मेद्वारहरुले गहुँ काट्न सहयोग गरेका हुन् । विष्णुका बाबु भीमप्रसादलाई द्वन्द्वकालमा माओवादीले हत्या गरेको थियो ।
बेथानचोक गाउँपालिकाको केन्द्र रहेको ढुंखर्कमा नेकपा एमालेका वडाध्यक्ष उम्मेदवार चेतनाथ प्रतिष्पर्धामा निकै अगाडि छन् । उनका प्रतिष्पर्धी नेपाली काँगे्रसका पुरुषोत्तम तिमल्सिना लामो समय जापान बसेर फर्केका व्यक्ति भएकाले उनलाई मतदाताले त्यति रुचाउने अवस्था छैन । त्यसमाथि चेतनाथको राजनीतिक तथा सामाजिक छविका अगाडि पुरुषोत्तमको उम्मेदवारी फिक्का हुने स्थानीय बासिन्दा बताउँछन् । नेपाली काँगे्रसभित्र मौलाएको गुटको राजनीतिले पनि पुरुषोत्तमलाई कमजोर पार्ने स्थानीय विष्णु सापकोटा बताउँछन् ।
वडाध्यक्ष उम्मेदवार चेतनाथ २०४७ सालमै विद्यार्थी राजनीतिमा सक्रिय थिए । उनको टिममा रहेका महिला सदस्य गोमा तिमल्सिना, दलित महिला सदस्य सीता विश्वकर्माका साथै खुला सदस्य विनोद र प्रेम लामा पनि राजनीतिमा सक्रिय उम्मेदवार मानिन्छन् ।
- न्युज काभ्रे संवाददाता
